Runi Langum

Runi Langum (f.1958) fangar i teikningane sine ei kjapp rørsle, ein augneblink i dansen. Ekspressivt, og med ein spontan representasjon av si eiga rørsle, blir augneblinken frosen. Mange av teikningane har ei varsemd i seg, ein eleganse der den poetiske og vakre rørsla til dansaren blir forsterka med ein fargetone, eller ein strek. Medan andre teikningar lyser av kraft og energi. Med ein skarpare og meir brutal strek, men innanfor same motivkrets, dans. Runi Langum er sagt å vera ein av Noregs beste teiknarar. Ho er kjent for å jobba i monumentale format, men nokre av arbeida er å finna som sjølvstendige verk i mindre storleik trykt som litografi.

Etter studiar på kunstakademiet i Trondheim 1978-1983, heldt ho fram studiane ved Ecole Nationale Superieure des Beaux Arts i Paris 1983-1986. Der spesialiserte ho seg i teikning og fekk 1.prix de dessin i 1986. Ho er innkjøpt av fleire museum og galleri, og har mange seperatutstillingar bak seg. Ho var festivalkunstnar i Galleri EKG under Flagstad-festivalen 2017.