Liv Krekke Kaada

Liv Krekke Kaada fekk interesse for kunst gjennom tekstile teknikkar, – strikking, hekling, broderi, veving og stofftrykk. Som kunstnar har ho valt å uttrykka seg i måleri, trykk og collage.

I collagane blir grafiske trykk eller malt lerret, mange med mønster og ornament som motiv, kutta opp og sett saman på nytt, i striper, vev eller stykke limd som mosaikk. Kunstnaren likar tanken på at motiv, minne og erfaringar blir blanda, gøymde og kanskje gløymde – men likevel blir verande som ein del av bildet. Åra, tida og minna flettar seg inn i kvarandre. Noko nytt oppstår som gjæv spenning i prosessen.

I måleria hentar Kaada idear frå collagane, og eit måleri kan inspirera til fleire. Ho byrjar som regel med eit rutenett. Det gir vertikale og horisontale linjer, slik som renning og innslag i ein vev. Ho påfører fleire strøk med akrylmaling på lerretet, ulike kulørar og nyansar, før ho  “overfører” former frå collagane og fortset med ei friare og intuitiv jobbing.

Liv Krekke Kaada er i måleria sine opptatt av fargar, lag på lag, transparens, komposisjon, bevegelse, retning og rytme. Ho ønsker at bilda skal uttrykka ein visuell musikalitet og vitna om tida det tar, minne og tradisjon.