Åse Berit Skeie Ulltang

ÅSE BERIT SKEIE ULLTANG (f.1964) jobbar med collage og akrylmåleri.

Ho har budd mange år i Sør-Korea, noko som gav innblikk i og kunnskap til
nye materiale og teknikkar. Handlaga koreansk papir, Hanji, har heilt
særeigne kvalitetar når det gjeld tekstur, farge og styrke. Skeie
Ulltang nyttar sterke farger opp mot kvarandre, i ein spontan og
intuitiv prosess. Saman med energiske penselstrøk og transparente lag
dannar ho nye abstrakte bilete. Biletkunstnaren finn sin inspirasjon i
samspel, endring og natur, og er opptatt av å sanse, undre seg og å vere
her og no.

Skeie Ulltang har si utdanning frå Kunstskulen i Bergen, i
tillegg til fleire kurs innan teikning og måling både i Noreg og
Sør-Korea. Dessutan har ho helsefagleg utdanning, og er spesielt
interessert i mellommenneskelege relasjonar og gestaltpsykologi. Skeie
Ulltang er medlem av Norske Billedkunstnere (NBK), Bildende Kunstneres
Forening Hordaland (BKFH) og Harding Puls. Ho har delteke på mange
utstillingar både utanlands og i Noreg og skal bl.a ha separatutstilling
ved Galleri N. Bergslien sommaren 2020.